Triquis de Chicahuaxtla

Gi̱niꞌhiaj nej suj dàj hua ñan màn nej guiì aꞌmin nânj nï̀nꞌïn

NEJ GUIÌ AꞌMIN NÂNJ Nï̀NꞌÏN

Nej yumanꞌ Aꞌmin Nânj Nï̀nꞌïn mân neꞌ gatûj gui riñan hioꞌó Akuej, ni̱ màn daꞌngaꞌ ꞌngo̱ si chi̱ꞌ nej sij yùhuìj mîn guiì. Ni̱ huàꞌnï̀nj yiꞌnïnꞌ huin sa hua̱ ni̱nï̱n ni̱ daꞌ goꞌngo̱ nej yumanꞌ nânj huin sa ña̱ꞌa̱n doj ni̱ nej yuman nânj huin: Yumanꞌ Nìko ni̱ ta̱a huìj mîn tá gàꞌanj siêntu riñan nne ña̱ꞌa̱nj. Ni̱ aꞌngoj huin yumanꞌ Samatî ( Natâj tun ), ni̱ huej huin yumanꞌ nngaj danï̱ïn ni̱ ta̱a huìj mîn tá ùnꞌùnꞌ siêntu tá huìj xia chi̱ꞌ riñan nne ña̱ꞌa̱nj. Ni̱ aꞌngoj huin yumanꞌ Sikí ni̱ ta̱a ꞌngo̱ mîn tá huàtànꞌ siêntu riñan nne ña̱ꞌa̱nj. Ni̱ nej yumanꞌ anun duguiꞌ neꞌ yìchràj a ngà yumanꞌ Aꞌmin Nânj Nï̀nꞌïn huin Yumanꞌ Duhua, ni̱ neꞌ ri̱ki anûn duguiꞌ nej sij ngà Yumanꞌ Rosario, yumanꞌ ngaj, Ta Degechrunj ni̱ nej yumanꞌ nânj nikoꞌ munisipio ngaj ni̱ aꞌmin nej sij nânj stila, ni̱ neꞌ gatûj gui: anûn duguiꞌ nej sij ngà Duchi, ni̱ neꞌ gatûj gui anûn duguiꞌ nej sij ngà estado Guerrero. Riñan página ni̱ka̱j nej ñûnj gànàrìꞌ nej suj: "Dàj ga̱huin chrun". Ni̱ hiuj nânj nun ꞌngo̱ ñanj digân rayiꞌî nej daꞌngaꞌ ga̱ra̱n sun nnga ga̱chru̱nꞌ, ni̱ niꞌñan ga̱ra̱n sun nej suj si ruhuâ nej suj ga̱chru̱n nej suj ñanj nânj nï̀nꞌïn. "Nuguanꞌ nâ". Gachrûn nej ñûnj dànèꞌ gaꞌhue gaꞌnaꞌ nej guiì aꞌmin nânj nï̀nꞌïn. "Ñanj Biblia". Gaꞌnḯn nej ñûnj N.T. ni̱ ꞌnaj riñan PDF ni̱ giꞌhiaj yu̱gui nej ñûnj riñan sa gùꞌnàj digital ni̱ hueꞌ dàj gàꞌ nun nuguanꞌ gu̱nïnꞌ sa gùꞌnàj sinkronizada ngà sa gu̱nïnꞌ rayiꞌì N.T. Ni̱ niꞌñan guendâ gi̱niꞌin nej suj Ñaꞌanj an, dadinꞌ huê guenda dan gaꞌnaꞌ Ma̱ꞌan Señor Jesús. "Sa niꞌhioꞌ ". Ni̱ nun sa nadigân nej ñûnj rayiꞌî ñanj N.T. "Ñan duꞌhuôꞌ ". Ni̱ hua̱ ꞌngo̱ galeria ñan màn ñan duꞌhua da̱ꞌa̱j nej yumanꞌan ni̱ dàj hua nej guiì yiñûnꞌ ni̱ dàj hua nej kïj yiñunꞌ. Nihia yìñànj an. Ni̱ gaꞌnḯn nej ñunj ꞌngo̱ ñanj gidigân dàj giꞌhiaj yu̱gui nej suj nakïnj ïn nneè. ¡Ga̱ꞌna̱ꞌ gi̱niꞌhiaj nej suj ni̱ gi̱ni̱ꞌin nej suj dàj hua rayiꞌî yiñunꞌ!