Nej guiì aꞌmin nânj nï̀nꞌïn
Nej yumanꞌ Aꞌmin Nânj Nï̀nꞌïn mân neꞌ gatûj gui riñan hioꞌó Akuej, ni̱ màn daꞌngaꞌ ꞌngo̱ si chi̱ꞌ nej sij yùhuìj mîn guiì. Ni̱ huàꞌnï̀nj yiꞌnïnꞌ huin sa hua̱ ni̱nï̱n ni̱ daꞌ goꞌngo̱ nej yumanꞌ nânj huin sa ña̱ꞌa̱n doj ni̱ nej yuman nânj huin: Yumanꞌ Nìko ni̱ ta̱a huìj mîn tá gàꞌanj siêntu riñan nne ña̱ꞌa̱nj. Ni̱ aꞌngoj huin yumanꞌ Samatî ( Natâj Tun ), ni̱ huej huin yumanꞌ nngaj danï̱ïn ni̱ ta̱a huìj mîn tá ùnꞌùnꞌ siêntu tá huìj xia chi̱ꞌ riñan nne ña̱ꞌa̱nj. Ni̱ aꞌngoj huin yumanꞌ Sikí ni̱ ta̱a ꞌngo̱ mîn tá huàtànꞌ siêntu riñan nne ña̱ꞌa̱nj. Ni̱ nej yumanꞌ Aꞌmin Nânj Nï̀nꞌïn anûn duguiꞌ neꞌ yìchràj a ngà Yumanꞌ Duhua, ni̱ neꞌ ri̱ki anûn duguiꞌ nej sij ngà Yumanꞌ Rosario, Yumanꞌ Ngaj, Ta Degechrunj ni̱ nej yumanꞌ nânj nikòꞌ munisipio Ngaj ni̱ aꞌmin nej sij nânj stila, ni̱ neꞌ gisîj gui anûn duguiꞌ nej sij ngà Duchi, ni̱ neꞌ gatûj gui anûn duguiꞌ nej sij ngà hioꞌó Guerrero.
Nej sa màn gànàrìꞌ nej suj riñan pagína nânj huin: Sa gidigân. Ni̱ gaꞌnḯn nej ñûnj ꞌngo̱ ñanj na̱ri̱ki̱ chrej e dàj ga̱hia̱ nej suj, ni̱ dàj ga̱chru̱n nej suj nânj nï̀nꞌïn: Nuguan nâ. Gachrûn nej ñûnj doj rayiꞌî dànèꞌ ga̱ꞌhue gaꞌnaꞌ nej guiì aꞌmin nânj nï̀nꞌïn. Si-nùguànꞌ Ma̱ꞌan Ñaꞌanj an. Ni̱ gaꞌnḯn nej ñûnj PDF nnùn N.T. Ni̱ huê danj na̱nj gàꞌ hua̱ yu̱gui nanè gu̱nïn nej suj daꞌ hua̱ ge̱ N.T. ni̱ ga̱ꞌhue ga̱huin chru̱n nej suj ga̱hia̱ nej suj, ni̱ ga̱ꞌhue ga̱huin chrun nej suj ga̱chru̱n nej suj. Sa niꞌhioꞌ. Ni̱ gaꞌnḯn nej ñûnj ngo̱ sa niꞌhioꞌ nnga nadigân nej ñûnj si gàꞌ gahui ꞌngo̱ ñanj N.T: Ñan du̱ꞌhuoꞌ. Ni̱ gaꞌnḯn nej ñûnj gàꞌì ñan du̱ꞌhuôꞌ ni̱ gi̱niꞌhiaj nej suj ni̱ giniꞌin nej suj dàj hua yiñán nêꞌ, dadinꞌ ûta nìhiàꞌ huaj: Nihia yìñànj an. Gachrûn nej ñûnj ꞌngo̱ ñanj aꞌmin dàj gi̱ꞌhiaj yu̱gui nej suj nakïnj nneè. Chrej yìñànj an. Nun nuguanꞌ gananï̂n rayiꞌî giꞌñanj santu. Gi̱niꞌhiaj nej suj ni̱ gi̱ni̱ꞌin nej suj dàj sa màn riñanj.
